Inalmahan ng kampo ng sinibak na si National Bureau of Investigation (NBI) Dir. Magtanggol Gatdula ang alegasyon na may kinalaman ito sa ambush kay Deputy Dir. Reynaldo Esmeralda.

Sinabi ni Abe Espejo, abogado ni Gatdula, na unfair sa kaniyang kliyente na iugnay agad ito sa ambush kung saan nagpahayag pa ito ng hinala na maaaring gawa-gawa lamang ang nasabing ambush.

"It was not far-fetched that the ambush on Esmeralda was staged, that it was done when the NBI deputy chief had three backup vehicles filled with NBI men who were unable to fire back at the attackers," pahayag ni Espejo.

Aniya, kung nagkaroon man ng ambush ay kaduda-dudang hindi nakaganti kahit isa ang mga NBI agents na security ni Esmeralda kasabay ng pagsasabi na hindi man lamang din inimbestigahan ng  Manila Police District (MPD) ang crime scene.

Samantala, agad nilinaw ni Justice Sec. Leila de Lima na hindi niya pinaparatangan si Gatdula sa naturang pananambang.

Ayon kay De Lima, ang sinasabi lamang niya ay nakakatanggap ng mga banta sa buhay ang mga miyembro ng fact finding team na nag-imbestiga sa Ohara case.

Kasama na aniya rito sina Esmeralda, Justice Asec. Zabedin Asis at Usec. Francisco Baraan III.

Sa ngayon ay nakipagpulong na umano siya sa iba pang deputy directors ng NBI at maging kay NBI OIC Nonatus Roxas para sa masusing imbestigasyon sa nangyaring ambush.