UNITED NATIONS - Sa ikalawang pagkakataon, muling vineto ng China at Russia ang isinusulong na resolusyon ng Europe at Amerika na nagkokondena sa karahasan laban sa mga sibilyan sa Syria.

Ito'y matapos ang ginawang botohan sa U.N Security Council kung saan 13 miyembro nito ang pumabor sa resolusyon.

Kaagad namang ipinahayag ng mga ambassador mula sa permanenteng miyembro ng council gaya ng United States, France, at United Nations ang hakbang na ito ng China at Russia.

Pinapalala lang anila ng naturang mga bansa ang 10 buwan ng kaguluhan doon.

"Those that have blocked potentially the last effort to resolve this peacefully ... will have any future blood spill on their hands," pahayag ni U.S. Ambassador Susan Rice. "The people of Syria have yet again been abandoned by this Council and by the international community."

Sa kabila nito, nilinaw ni French President Nicolas Sarkozy na nagpapatuloy sa ngayon ang diplomatic efforts para buuin naman ang tinatawag nilang "Group of Friends for the Syrian People."

Una ng nagpasaklolo ang mga mamamayan ng Syria sa international community para matuldukan na ang pag-atake ng puwersa ni Pres. Bashar al-Assad.

Bago ang botohan, tahasang sinabi ni U.S President Barack Obama na nawala na ang legitimacy ni Assad na mamuno sa Syria kaya't nagtutulungan ngayon ang world powers laban sa "killing machine" ng nagmamatigas na Syrian president.

Maging si U.N. Secretary-General Ban Ki-moon ay nanghihinayang sa pagharang ng China at Russia na matapos na ang madugong karahasan sa Syria.

Samantala, dumipensa naman ang dalawang bansang nag-veto sa resolusyon.

Suportado umano nila ang pagtatapos ng karahasan sa Syria pero sadyang hindi lang malinaw at maayos ang ipinapakita sa resolusyon.

Ayon kay Russian Ambassador Vitaly Churkin, "the text did not adequately reflect the real state of affairs and sent an unbalanced signal to the various sides in Syria."

Habang para kay Chinese Ambassador Li Baodong, mas magiging komplikado lang ang sitwasyon sa Syria dahil sa isinusulong na resolusyon.

Napag-alaman na nakapaloob sa nasabing resolusyon ang pagsuporta sa panawagan ng Arab League kay Assad na ilipat na ang kapangyarihan at umalis ito sa puwesto.

Pero hindi na raw nakapaloob sa resolusyon ang sanction laban sa Syria upang makuha ang suporta ng China at Russia na nag-veto noon sa unang resolusyon na inihain ng Gran Britanya.

Ang China at Russia ay permanent members ng UN Security Council at anumang veto mula sa limang permanent members ay otomatikong papatay sa anumang resolusyon ng naturang UN body. (CNN)