LEGAZPI CITY - Inirekomenda ni Albay Governor Joey Salceda ang parusang habang- buhay na pagkakabilanggo para sa sinumang mapapatunayan na responsable sa pagnanakaw ng mga kagamitan ng mga disaster agencies kagaya ng Philippine Institute of Volcanology and Seismology (Phivolcs).

Sa isinagawang pagpupulong sa Office of Civil Defense (OCD)- Bicol kaninang umaga, iminungkahi ni Gobernador Salceda na dapat nang amyendahan ang batas laban sa ganitong mga kaso kung saan umaabot sa P50, 000 hanggang P500, 000 ang multa at anim na buwang pagkakabilanggo ang parusa sa mapapatunayang nagkasala.

Ayon sa opisyal hindi nararapat bigyan ng pagkakataong makapag- pyansa ang salarin sa pagkawala ng mga mahahalagang kagamitan ng mga disaster agencies dahil ang naturang mga kagamitan gaya na lamang ng mga ninakaw na gamit ng Phivolcs- Legazpi ay importante upang mapangalagaan ang buhay ng mga mamamayan partikular ang mga malapit sa paanan ng aktibong bulkang Mayon.

Napag- usapan din sa ipinatawag na emergency meeting ng OCD na dapat nang i- classify ang mga kagamitan ng Phivolcs bilang vital installation kung saan nangangahulugan na dapat na itong makasama sa listahan ng mga prayoridad para sa pagpapatrolya ng AFP at PNP.

Napag- alaman din na walang alam ang ilan sa mga alkalde sa Albay tungkol sa mga naka- install na gamit ng Phivolcs sa kanilang mga lugar kung kaya't hindi ito nabibigyan ng pansin at hindi mahigpit na nababantayan.

Hiling ngayon ng mga concerned disaster agencies ang commitment mula sa mga LGUs.

Magugunitang nagpatawag ng emergency meeting ang OCD- Bicol sa pangunguna ni OCD- Bicol Regional Dir. Raffy Alejandro kaninang umaga upang pag- usapan ang mga hakbang makaraan ang sunod- sunod na pagnanakaw sa ilang mga early warning devices ng Phivolcs-Legazpi.