Maaantala ang pag-uwi sa labi ni Negros Rep. Iggy Arroyo mula sa London.

Ito ang malungkot na ibinalita ngayong umaga ni Atty. Lorna Kapunan, abugado ni Aleli Arroyo, legal wife ni Rep. Iggy.

Sinabi ngayon ni Atty. Kapunan, 'all-set' na ang kanilang pagkuha sa bangkay ni Rep. Arroyo pero bigla silang pinigilan ng abugado ng punerarya sa London.

Ayon kay Kapunan, ipinaliwanag umano ng abugado ng punerarya na may instruksyon ang kanilang kliyente na si Grace Ibuna na ipa-cremate ang labi ni Rep. Arroyo sa London.

Si Grace Ibuna ang 'common law wife' ni Arroyo at kasama hanggang sa huling sandali sa London.

Ito rin ang nagdesisyon na tanggalin na ang life support kay Arroyo matapos magkaroon ng cardiac arrest.

Napag-alaman na balak din ni Ibuna na magsampa ng kaukulang kaso sa London Court para maharang ang pag-uwi sa bangkay ni Arroyo sa Pilipinas.

Sinabi pa ni Kapunan na labis silang nagtataka dahil maayos naman ang kanilang usapan kahapon at wala ding hurisdiksyon ang korte sa United Kingdom dahil pamilya ni Arroyo ang nagke-claim sa bangkay.

Hihingi umano sila ng tulong sa embahada ng Pilipinas sa London pero sa Lunes na sila aapela dahil sarado ngayon ang mga korte.

Nanawagan din ito ng dasal na maayos din ang lahat para sa pamilya ng namayapang kongresista.

"Nagulat lang kami nung makausap 'yung lawyer ng funeral parlor na ang instruction ng kliyente nila ay i-cremate. Kaya tinanong ko kung sino ang kliyente niyo? Inamin na si Grace Ibuna at maghahain ito ng kaso," ani Kapunan.