Aminado ang prosekusyon na hindi sila nakakatiyak kung may kapangyarihan ang Senado na tumatayong impeachment court na i-subpoena ang dollar accounts ni Chief Justice Renato Corona.

Sa panayam ng Bombo Radyo kay House lead prosecutor Rep. Niel Tupas, tanging nakakatiyak sila na may kapangyarihan ang impeachment court na busisiin ang peso accounts ni Corona dahil mas mataas umano ang hukuman kaysa Bank Secrecy Law.

Ngunit nasa mga senador-judges na umano ang pagpapasya kung ano ang gagawin sa dollar accounts ng punong mahistrado.

Nitong nakaraang linggo ay pinapa-subpoena ng prosekusyon ang mga accounts ni Corona kasama ang misis na si Cristrina na umano'y kabilang sa mga kayamanan na hindi ideneklara sa kanyang statement of assets, liabilities and net worth (SALN).

Bagamat sa ngayon ay nakabinbin pa sa impeachment court ang kahilingan ng prosekusyon pero ayon kay Tupas sakaling papayagan ng Korte na busisiin ang bank accoounts ng punong mahistrado ay maaring tatagal pa ang paglilitis sa kontrobersiyal na SALN ni Corona.

Mariing naman tinutulan ng depensa na ipa-subpoena ang bank accounts ni Corona.

Ayon kay Atty. Karen Jimeno ang tagapagsalita ng depensa, paglabag ito sa karapatan ng punong mahistrado na anila’y bahahi ng fishing expedition.