Nahaharap ngayon sa patong-patong na kaso sa Department of Justice (DoJ) ang anim na suspek na umano'y miyembro ng Bundol Gang.

Inirekomenda ng Philippine National Police (PNP) sa DoJ na litisin sa mga kasong robbery with attempted homicide and carnapping, robbery in band at illegal possession of high powered firearms and ammunitions pati na ng paglabag sa election gun ban ang mga suspek na sina Felimon Borillo, Jeffrey Martinez, Allan Aristorenas at Roberto Bunzon.

Kasama sa mga nag-file ng kaso ang PNP-Cavite, PNP-Las Piñas at PNP-CIDG.

Ang kaso ay bunsod ng reklamo ng biktimang si Gregorio San Diego noong Nobyembre 4, 2010, kung saan galing sa airport ang mag-anak na San Diego nang harangin ng mga suspek ang kanilang Montero vehicle at kinuha ang pera na nagkakahalaga ng mahigit P.5 million bukod pa sa mga mahahalagang gamit.

Ang kasong carnapping ay batay naman sa reklamo nina Mark Vincent Adrias at Navine Jan Talite, kung saan puwersahang tinangay umano ng mga suspek ang Nissan Saffari ng biktima na may plate number UAN-553 at kinuha ang mga personal na gamit ng mga bikitma.