Makalipas ang ilang araw na nararanasang mga pag-ulan sa maraming lugar sa Luzon kasama na ang Metro Manila, tinaya ngayon ng Pagasa na bukas ay posibleng gumanda ganda na ang panahon.

Ayon sa Pagasa, magiging partly cloudy ang kanilang forecast bukas sa Kamaynilaan, taliwas ngayong araw o nakalipas na tatlong araw na malalakas ang pagbuhos ng ulan bunsod pa rin ng cold front.

Kahapon ang malakas na pag-ulan at ilang naitalang bahagyang pagbaha ay nagdulot ng matinding trapiko sa maraming lugar sa Metro Manila.

Samantala, ang kalakhang Maynila ay makakaranas ng madalas na maulap na kalangitan na may pag-ulan at pagkulog-pagkidlat.

Katamtamang hangin naman mula sa hilagang-silangan ang iiral at ang look ng Maynila ay magiging katamtaman ang pag-alon.

Ang hilaga at gitnang Luzon ay makakaranas ng madalas na maulap na kalangitan na may kalat-kalat na pag-ulan at pagkulog-pagkidlat na magiging malawakang pag-ulan sa mga silangang bahagi na maaaring magdulot ng mga pagbaha at pagguho ng lupa.

Ang nalalabing bahagi ng bansa ay magiging bahagya hanggang sa maulap na may pulu-pulong pag-ulan o pagkulog-pagkidlat.

Katamtaman naman hanggang sa malakas na hangin mula sa hilagang-silangan ang iiral sa Luzon at ang mga baybaying dagat
nito ay magiging katamtaman hanggang sa maalon.

Sa ibang dako, ang hangin ay mahina hanggang sa katamtaman mula sa silangan hanggang hilagang-silangan na may banayad hanggang sa katamtamang pag-alon ng karagatan.