YOKOHAMA, Japan - Isusulong ni Pangulong Benigno "Noynoy" Aquino III ang Public-Private Partnership (PPPs) program sa gaganaping Asia-Pacific Economic Cooperation (APEC) leaders summit sa Yokohama, Japan.

Ang nasabing programa ay itinatag para mapabilis ang financing at pagpapatayo ng mga pangunahing proyekto ng pamahalaan.

Sinabi mismo ng Pangulo na layon nitong hikayatin ang mga negosyanteng Hapon na makibahagi sa nasabing programa.

Samantala, sa panayam ni Bombo Reymund Tinaza kay Charges de' Affaires Belen Anota sa Tokyo, Japan, sinabi nitong aasahan ang pag-uusap ng mga miyembro ng APEC kung paano ganap na makabangon sa epekto ng pinagdaanang global financial crisis.

Ayon kay Anota, lahat ng mga miyembro ng APEC, kung 'di man tuwiran, ay nakaramdam din ng impact ng nasabing krisis.

"Kaya mahalagang makadalo ang Pangulong Aquino at masabi ng ating Pangulo kung paano matutulungan natin as a group ang pagpapabuti ng kalakalan ng ekonomiya ng Pilipinas na magreresulta ng magandang developments para ang ating mga tao'y magkakaroon ng hanapbuhay," ani Anota sa Tokyo.