CAIRO - Kulang-kulang apat na buwan mula ngayon, nakatakda ng malaman ang magiging final verdict laban kay dating Egyptian Pres. Hosni Mubarak.

Ayon sa abogado ng mga biktima ng pagmamalupit ni Mubarak, sa June 2 ibababa ang hatol kay Mubarak kaugnay sa kasong korupsyon at pag-utos ng pagpapatay sa mga nag-rally sa kanyang rehimen.

Napag-alaman na pitong buwan na ang tinaguriang "trial of the century" pero natutuwa naman ang civil rights lawyer na kumakatawan sa mga kaanak ng mga biktima, sa takbo ng paglilitis.

Sa talaan ng Amnesty International, tinatayang 840 katao ang nasawi habang mahigit 6,000 ang sugatan bunsod ng 18 araw na karahasan sa Egypt bago napatalsik si Mubarak.

"As president, Mubarak was responsible for protecting all Egyptian citizens. He didn't take the appropriate measures to carry out his duty to stop the bloodshed and the acts of violence against the Egyptian people," wika ni Prosecutor Mustafa Suleiman.

Una ng naiulat na posibleng death penalty ang maihatol sa dating pangulo ng Egypt. (CNN)