TEHRAN - Dismayado ngayon ang Estados Unidos matapos na hindi umusad ang hirit na nuclear talks ng Iran sa kabila ng pagtungo roon ng UN nuclear inspectors.

Ayon kay White House spokesman Jay Carney, nanghihinayang sila dahil walang nabuong kasunduan ang Iran sa mga International Atomic Energy Agency (IAEA) inspectors hinggil sa pagsunod nito sa kanilang international obligations sa pamamagitan ng pagsuko sa kanilang nuclear program na matagal ng pinag-iinitan ng Western powers.

"We regret the failure of Iran to reach an agreement with the IAEA. It's another demonstration of Iran's refusal to abide by its international obligations," ani Carney.

Nagbabala rin ang Russia ng "catastrophic" consequences ngayong nabuhay na naman ang tensyon sa Iran.

Ayon sa France, nawala na ang oportunidad na pagkakaroon ng maayos at malinaw na nagosasyon sa pagitan ng Tehran at world powers.

Sa ngayon ay wala raw nakikita si IAEA chief Yukiya Amano na magiging tapat ang Iran sa negotiating table matapos na tumanggi ang mga ito na mag-inspeksyon sa kanilang bansa.

Ang Amerika, Gran Britanya, France, Russia, China at Germany ay tinaguriang "P5+1" na nakikipagdiyalogo sa Tehran.

"This latest snub, along with its decision to begin enrichment at Qom, underscore Iran's defiance of the international community and multiple Security Council resolutions," pahayag naman ng isang Western diplomat.

Samantala sa kabila ng pagtaas ng presyo ng langis bunsod ng tensyon sa Iran, naninindigan ang supreme leader nitong si Ayatollah Ali Khamenei na kailanman ay wala silang itinagong atomic weapon bagama't national interest ito sa kanilang bansa.

"Possessing a nuclear bomb constitutes a major sin.. but nuclear energy is in Iran's national interest. Pressure, sanctions, threats and assassinations will not bear any fruit and Iran will continue its path of (nuclear) scientific development," ani Khamenei. (CNA)