CHRISTCHURCH, New Zealand - Ginunita ng buong New Zealand ang unang anibersaryo ng magnitude 6.3 na lindol na tumama sa lungsod ng Christchurch kung saan 185 ang namatay.

Sa kaniyang speech, inihayag ni New Zealand Prime Minister John Key na ang nasabing kalamidad ay isa sa pinakamalagim na araw sa kasaysayan ng bansa.

"It twisted buildings, tore up roads, destroyed homes and shook us to the core," ani Key. "Worst of all it stole 185 loved ones from us and injured so many more."

Nagtipon ang mga emergency workers at kamag-anak ng mga biktima, sa isinagawang seremonya sa Latimer Square upang alalahanin ang mga nasawi sa naturang kalamidad.

Aminado ang Prime Minister na mabagal ang rehabilitasyon ng Christchurch pero tiniyak ang determinasyon ng gobyerno na maibalik sa dati ang ikalawang pinakamalaking lungsod ng New Zealand.

Binigyang pugay din ni Key ang mga rescuers sa bansa at mula sa international community na nagresponde sa kalamidad. 

"It will also be a day when, at the worst of all times, the best of the human spirit was on display. That spirit is something no earthquake can take away."

Nag-alay ng dalawang minutong katahimikan eksaktong alas-12:51 ng tanghali oras sa New Zealand, kung kailan tumama ang lindol.

Kasabay naman ng unang anibersaryo, niyanig ng magnitude 2.9 na lindol ang Christchurch, halos 20 minuto matapos ang isinagawang seremonya para gunitain ang malagim na trahedya. (AFP)