KIEV - Nagdulot ng panic sa 262 pasahero ng isang barko sa Italy matapos itong hampasin ng malakas na alon kasabay ng nararanasang cold wave sa Europe.

Bagama't na-rescue ang lahat ng mga pasahero, tila nag-flashback umano ang pagsadsad noong nakaraang buwan ng cruise ship sa nasabing bansa na ikinamatay ng mahigit sa 30 katao.

"The accident, which tore a 25-metre (80-foot) hole in the ship's side above the waterline, happened after the vessel was buffeted by a violent snow storm from the north-east," pahayag ni Coastguard spokesman Carnine Albano.

Nagpapasalamat naman ang mga opisyal ng Italya sa pagkakaligtas sa mga pasahero ng barko, dahil kung sakali anila ay lalong tataas ang bilang ng death toll sa Europe cold wave.

Napag-alaman na mula 173, pumalo na ngayon sa 260 ang iniiwang patay ng matinding lamig ng panahon sa Europa.

Pinakamarami rito ay mula sa Ukraine na nakapagtala ng 122 bilang ng mga nasawi.

Bumaba rin ang temperatura sa -38.1 degrees Celsius (minus 36.5 Fahrenheit).

Nananatili ring bagsak ang transport services habang ipinagpapatuloy ang emergency services para linisin ang snow sa mga lansangan.

Sa Poland, umakyat na sa 45 ang mga namatay kung saan bumagsak naman sa -27C (minus 32F) ang temperatura.

Sa Romania, apat pang bangkay ang narekober dahilan upang maging 28 ang death toll doon.

May mga naitala ring patay bunsod ng Europe cold snap sa Bosnia, Latvia, Lithuania, Estonia, Bulgaria, the Czech Republic, Slovakia, France, Austria at Greece.

Karamihan sa mga binabawian ng buhay ay yaong mga walang tirahan na natutulog sa lansangan kaya't dinapuan ng sakit na hypothermia o sobrang ginaw.

Umaabot sa 28 municipalities sa Serbia ang isinailalim sa state of emergency na karamihan ay yaong mga nasa kabundukan.

Maging ang Bosnian authorities ay nagdeklara na rin ng state of emergency.

Sa ngayon ay 25,000 kabahayan o katumbas ng 60,000 katao ang walang suplay ng koryente sa ilang European countries bunsod ng snow. (AFP)