BEIRUT, Lebanon - Nakatakdang pagbotohan ngayong gabi ng United Nations Security Council ang resolusyon kaugnay sa nangyayaring krisis sa Syria.

Ito ay sa gitna ng matinding karahasan ngayon na nangyayari sa lungsod ng Homs sa nasabing bansa.

Ayon sa grupong Syrian Observatory for Human Rights at Local Coordination Committees, umaabot sa 200 ang patay simula kagabi, nang paulanan ng mortar shells ng security forces ni Syrian President Bashar Assad ang Homs.

Ito na umano ang pinakamadugong araw sa 11 buwan nang kaguluhan sa African nation.

Sa area lang ng Khaldiyeh, 140 umano ang napatay sa pagsisikap ng mga sundalo ni Assad na makontrol ang lugar.

Dahil dito, lalong nadadagdagan ang pressure sa UN Security Council na gumawa na ng hakbang para matigil ang karahasan.

Sa gitna ng pagmamatigas ng Russia na suportahan ang resolusyon na nananawagan kay Assad na ilipat ang kapangyarihan, kinausap ni US Secretary of State Hillary Clinton si Russian Foreign Minister Sergey Lavrov para himukin itong suportahan ang isinusulong na hakbang laban sa Syria.

Subalit una nang nilinaw ng Amerika at mga kaalyadong bansa na hindi kabilang ang military action, sa mga opsyon nila para sa Syria. (AP)