Lumutang sa Department of Justice (DoJ) ang aktres at dating Quezon City councilor na si Aiko Melendez para dumalo sa preliminary investigation ng reklamong libel na inihain laban sa kaniya ng dating kasintahan na si Bulacan, Bulacan Mayor Patrick Meneses.

Respondent din sa nasabing reklamo ang showbiz reporter na si Ogie Diaz, habang bigo namang makadalo ang complainant na si Meneses.

Nag-ugat ang pagsasampa ng kaso ni Meneses sa celebrity politician dahil sa pagpapakalat umano nito na siya ay bading nang sila ay maghiwalay na mariin namang itinanggi ni Melendez.

Ito ang kauna-unahang preliminary investigation sa DoJ para sa nasabing reklamo makaraang paboran ng kagawaran ang hiling ni Melendez na transfer of venue mula sa Prosecutor’s Office sa Malolos, Bulacan.

Gayunman, nagulat ang mga abogado ng respondent nang malaman mula kay Asst. State Prosecutor Alexander Suarez, ang piskal na may hawak ng reklamo, na mayroon na palang joint resolution na binalangkas ang Bulacan Provincial Prosecutor's Office kaugnay ng kaso.

Nagtataka ang panig ng mga respondent kung paano nagkaroon ng resolusyon ng hindi nila nalalaman at sa kabila ng pag-apruba sa hiling nila na transfer of venue.

Dahil dito, naniniwala si Atty. Argee Guevarra, abogado ng respondent na si Pete Ampoloquio, na may iregularidad sa nasabing resolusyon.

Gayunman, sinabi ni Suarez na walang epekto ang resolusyon dahil hindi naman nabigyan ng kopya nito ang mga partidong sangkot at tuloy pa rin ang preliminary investigation sa reklamo.

Itinakda ni Suarez ang susunod na pagdinig sa ika-14 ng Marso, alas-2:00 ng hapon.