Binigyang-diin ngayon ng “Bourne Legacy” lead actor na si Jeremy Renner na wala silang pinagsisisihan na piliin ang Pilipinas bilang shooting location sa kanilang pelikula.

Ang grupo ni Renner ay nagsagawa ng courtesy call kay Pangulong Noynoy Aquino kaninang umaga sa Palasyo ng Malacañang.

Sinabi ni Renner na masayang-masaya sila dahil sa Maynila sila natuloy imbes na mga lugar sa Vietnam at Indonesia na unang naikonsidera.

Nagpahayag din si Patrick Crowley, executive producer ng pelikula, na nakakatuwa ring makatrabaho ang mga counterpart na Filipino crew at producers.

Kasabay nito, ipinaabot naman ng Pangulo ang pasasalamat sa pagpili sa bansa bilang shooting location at umaasang makakatulong ito sa pagpapalago ng local tourism industry.

Umaasa rin si P-Noy na mas marami pang foreign films ang gagawin sa Pilipinas.

Sina Renner, Crowley at iba pang miyembro ng crew ay pare-parehong naka-barong tagalong bilang pakikiisa sa national costume ng bansa.