VIGAN CITY - Inihahalintulad na pangkaraniwang tanawin na ng lalawigan ng Ilocos Sur ang madalas na pagbisita ng magaling at maganda pa ring aktres na si Dina Bonnevie.

Sa hayagang pag-amin ng aktres sa kanyang pagmamahal kay Ilocos Sur Vice Gov. DV Savellano, may ilang taga-Ilocos Sur ang umaasang natagpuan na nga ng bise gobernador ang makakasama niya sa habangbuhay dahil mahigit 10 taon na rin itong hiwalay sa kanyang misis, kung saan apat ang naging anak nila.

May ilang mamamayan ang lihim na masaya para sa bise gobernador, na bagama't napakaraming pinagkakaabalahan sa pulitika't negosyo, ay maaaring dumating na ang bubuong muli sa isang tahanan at pamilya ni Vice Gov. Savellano.

At kahit hanggang sa mga oras na ito ay hindi pa makausap si Vice Gov. Savellano, saksi ang ilang kababayan sa espesyal na relasyon nila ng aktres.