Hindi maiwasang uminit ang ulo ng mga motorista na dumaan kanina sa Ramon Magsaysay Boulevard sa Sta. Mesa, Maynila.

Ito'y bunsod ng matinding traffic na idinulot nang isara ito para sa shooting ng Hollywood movie na "The Bourne Legacy."

Maraming sasakyan ang naipit malapit sa isang mall sa Sta. Mesa habang kinukunan ang establishing shots para sa eksenang naghahabulan ang sasakyan.

Wala sa lokasyon ang mga bidang sina Jeremy Renner at Rachel Weisz, sa halip mga stuntman ang kinunan.

Una nang nagbabala ang Metropolitan Manila Development Authority (MMDA) na iwasan ang lugar.

Bukas ay muling isasara ang Ramon Magsaysay Boulevard at sa susunod na weekend dahil pa rin sa shooting ng "The Bourne Legacy."