CAUAYAN CITY, Isabela - Ipinagmamalaki ng kanyang mga magulang, kamag-anak at mga kabarangay si PO1 Danilo “Bong-bong”  Malab Jr. ng Sinabbaran, Echague, Isabela sa pagsisilbi bilang isa sa honor guards sa flat bed truck na naghatid sa labi ni dating Pangulong Corazon Aquino sa huling himlayan sa Manila Memorial Park noong Miyerkules.

Sa naging panayam ng Bombo Radyo Cauayan kay Danilo Malab Sr., ama ni PO1 Malab, sinabi niya nagtext mismo sa kanya ang anak  na isa siya sa apat na napiling honor guards sa paghahatid kay Ginang Aquino.

Ayon sa matandang Malab, hinahangaan nila ang anak at tatlong mga kasama sapagkat hindi sila natinag sa loob ng halos siyam na oras na nakatayo sa tabi ng kabaong ng dating pangulo sa kabila ng   pagbuhos ng ulan at pagbato sa kanila ng barya ng ilang mamamayan na nadaanan ng funeral convoy.

Si PO1 Malab ay 25-anyos, panganay sa tatlong anak ng mag-asawang Danilo Malab Sr. na isang electrician at Alicia Malab na isang agriculture technician.

Nagtapos siya ng Bachelor of Science in Criminology sa St. Ferdinand College sa Ilagan, Isabela.

Ayon sa ama nito, masigasig at masipag sa pag-aaral ang kanyang anak.

Nakapasok umano ito sa PNP noong 2008 at unang nadestino sa pulisya sa Benguet ng anim na buwan bago napunta sa Kampo Krame.

Ayon pa kay Ginoong Malab masaya at proud sila sa kanyang anak dahil sa dinami-dami ng mga pulis ay siya pa ang napiling kumatawan sa PNP na maging honor guard.

Samantala, sinabi naman ni Punong Barangay Avelino Pasuquin ng Sinabbaran, Echague na pride nila ang pagkakapili ni PO1 Malab na maging Honor Guard ng yumaong Pangulo.

Dahil sa karangalang hatid sa kanila ay pararangalan si PO1 Malab sa pista ng kanilang barangay ngayong ika-26 ng Agosto.

Samantala, taga-Panicien, Aurora, Isabela naman si Army Pfc. Class Antonio Cadiente na isa rin sa apat na honor guards.

Ipinagbunyi rin siya ng kanyang mga magulang at kamag-anak sa pagkakapili na mag-escort.

Ayon sa kanyang ama na si Francisco Cadiente na isang magsasaka, tuwang-tuwang sila ng makita ang kanyang anak sa telebisyon bilang isa sa apat na honor guards.