ILOILO CITY - Ginreklamo sa Bombo Radyo Iloilo sang isa ka Sangguniang Kabataan (SK) Chairman ang ginhimu nga pag-house sang mag-ama nga Sangguniang Bayan (SB) member kag SK Chairman sa banwa sang Cabatuan, Iloilo.

Suno sa tagreklamu nga si SK Chairman Catherine Joy Continente sang Brgy. Calawagan, Cabatuan, nagpangayu sang bulig sa ila ang SK Chairman nga si April orica.

Ini bangud indi na sini luyag nga magbalik sa balay ni SK Chairman Lalaine Nandin, anak ni SB member Reynaldo Nandin kun sa diin sila gintipon.

Ginpahayag sang tagreklamu nga ila gindala sa balay sang isa ka SK Chairman nga si R-Jay Arillo si Orica matapos nagpangayu sang bulig sa ila apang ginpadal-an sila sang pulis sang amay nga Nandin kag ginpagwa nga ginpilit nila si Orica nga mag-upod sa ila.

Magluwas sini, ginreklamu man ni Continente ang ginhimu nga pagpanagtag sang mag-ama sa mga SK chairman sang cellphone kag kwarta.

Ginpahayag sini nga naghalin ang kwarta nga ginpanagtag sang mga ini sa gobernador, congressman kag mayor.

Nahibaluan nga magapapili bilang SK Federation president ang bata nga Nandin sunu sa tagreklamu.