CENTRAL MINDANAO - Duha ka mga miyembro sa Special Civilian Volunteer Organization (SCVO) ang nadakpan sa otoridad sa alas 4:00 sa kadlawon, niadtong Domingo, didto sa probinsiya sa Maguindanao.

Nailhan sa kapulisan ang mga suspek nga sila Atutuhan Esmael ug Sandula Masukat, nga gitumbok nga mga sinaligan ni Datu Unsay Mayor Datu Andal Ampatuan Jr.

Gibutyag ni Maguindanao Provincial Director S/Supt Marcelo Pintac, nga gironda sa hiniusang pwersa sa militar ug kapulisan ang gitaguan sa mga suspek sa Barangay Poblacion, Datu Hoffer Ampatuan.

Unang nasikpaw si Esmael sulod sa iyang pinuy-anan samtang nakasibat si Masukat,apan pagkataud-taud ang gitahan siya sa iyang pamilya sa kapulisan.

Gidugang ni Pintac nga ang mga suspek positibong nalambigit sa milabay nga masaker sa Sitio Masalay, Barangay Salman, Ampatuan, nga mikalas sa 57 ka kinabuhi apil na ang 32 ka mga sakop sa lokal media didto sa Central Mindanao.

Giturn-over dayon sila Masukat ug Esmael sa Criminal Investigation and Detection Group (CIDG-ARMM) aron pagadal-on sa kauluhan og i-presenta sa korte.

Andam sab nga ihatag ni Maguindanao Governor Ismael Toto Mangundadatu,ang reward money sa mga tawo nga maoy nagtudlo sa gitaguan sa mga suspek.

Gihingusgan karon sa militar ug kapulisan ang ilang operasyon batok sa mga tawo nga nalambigit sa masaker ug mga private Armed Groups sa Maguindanao. (Bombo Garry Fuerzas)