Empleyado sang bottling company, ginluthang-patay sa Pavia, Iloilo

ILOILO CITY–Patay ang empleyado sang isa ka bottling Company matapos ginluthang sang wala pa makilala nga suspek nga nakasakay sa motorsiklo sa Brgy. Ungka 2, Pavia, Iloilo.

Sa interview sang Bombo Radyo kay SPO1 Jeffrey Ubaob, imbestigador sang Pavia Municipal Police Station, iya ginpahayag nga ang biktima ang ginkilala nga si Jethro Ferrer, 29 anyos sang Brgy. East Valencia, Buenavista, Guimaras kag naga-board lamang sa nasambit nga lugar.

Si Ferrer ang may igo sa tangkugo lapus sa guya kag likod lapus sa tiyan nga gindeklarar nga Dead On Arrival (DOA) sa Western Visayas Medical Center (WVMC).

Ginapahayag nga papauli na kun tani sa iya boarding house ang biktima sang ginluthang sang wala nakilala nga suspek.

Santo sa pagpangusisa, ang utod ni Ferrer ang sadto anay biktima man sang riding-in-tandem diri sa Iloilo.