GENERAL SANTOS CITY -Gikalipay sa katawhan sa Alabel, Sarangani Province ang tanyag nga 3-milyones ka pesos ni WBC JUnior Welterweight Champion Manny Pacquiao alang sa kasaulugan sa 8th Kasadyaan Festival ug 38th Foundation Anniversary sa katapusang semana sa bulan sa Agusto.
Matud pa ni Alabel Mayor Corazon Grafilo, gianunsiyo ni Pacman nga muhatag kini ug P3-M isip dugang sa 700-mil ka pesos nga budget sa munisipyo alang sa kasaulugan.
Gibutyag nga daghang mga bisita ang giimbitahan sa lokal nga panggamhanan alang sa kapin usa ka semana nga selebrasyo, gikan sa Agusto 29 hangtud Setyembre 10.
Apil nga gilaumang mamahimong bisita mao ang mga artista kinsa mupahigayon ug konsiyerto human giimbitahan ni Pacman.
Lain pang mga aktibidad nga ipahigayon mao ang Manny Pacquiao Dart Tournament ug ang Basketball Exhibition Game nga pangunahan sa Pacman Team, kon asa dagkong premyo ang giandam alang sa mga mananaog.
-
