Apat ka durugista, dakop sa buybust operation sa Lapaz, Iloilo City

ILOILO CITY–Dakop ang apat ka mga tawo sa buybust operation nga ginpatigayon sang City Drug Enforcement Unit (CDEU) kag Lapaz PNP sa simbahan sang Lapaz, Iloilo City.

Lakip sa mga nadakpan amo sanday Frederick “Ching” Sumullo, 26 anyos , sang Brgy. Cabangbang, Jaro, Iloilo City, Lexie Cordero, 23 anyos sang Brgy. Alalasan, Lapuz, Iloilo City, Gus Quisumbing, 45 anyos sang Alta Tierra Village, Jaro , Iloilo City kag Jennifer Potato, 40 anyos sang Yulo Drive, Arevalo, Iloilo City.

Sa interview sang Bombo Radyo kay SPO2 Alfred Tilano, team leader sang CDEU, iya ginpahayag nga subject sang buybust operation si Sumullo kag kahimbon naman ang tatlo ka iban nga nagkaladakpan.

Suno kay Tilano, nagasaylo-saylo sang gina-istaran si Sumullo agud indi gilayon madakpan.

Natukiban man nga sa Bacolod City ginakuha ni Sumullo ang iya ginabaligya nga iligal nga droga.

Nakuha sa apat ang 12 ka sachet sang suspected shabu nga nagabalor 150,000 pesos.

Ang apat ang preso sa Lapaz Police Station kag magapangatubang sang nagakaigo nga kaso.